Venjaraleiðin er byrjað

Fyrsti partur av nýggja átakinum Venjaraleiðin varð avgreiddur um vikuskiftið

Rebekka J. Olsen (t.h.) og Kristina D. Simonsen (t.v.) eru millum luttakararnar á Venjaraleiðini - Mynd: Bjarni Enghamar

Rebekka J. Olsen (t.h.) og Kristina D. Simonsen (t.v.) eru millum luttakararnar á Venjaraleiðini - Mynd: Bjarni Enghamar

Sum liður í arbeiðnum at útvega fleiri kvinnuligar venjarar, verður í ár skipað fyri átakinum “Venjaraleiðin”. Talan er um venjaraskeið fyri kvinnur við B1, har luttakararnir taka B2 og B3 yvir fleiri vikuskiftir í 2021, skrivar Fótbóltssambandið.

Undirtøkan fyri Venjaraleiðini hevur verið sera góð, og skeiðini eru fult teknaði. Motivatión, frálæruhættir, venjingarhættir, skaðafyribyrging og tann góða byrjanin vóru millum evnini hetta vikuskiftið, og skeiðið er sum heild komið væl frá byrjan.

– Luttakararnir hava glett seg til at koma í gongd, og tað hava vit eisini, tí hetta er ein heilt nýggjur og spennandi máti at skipa venjaraskeið uppá. Støðið í framløgunum og kjakinum hevur verið gott, og tað sær út til at rigga væl at skapa hendan bólkin av kvinnum, sum allar taka venjaraskeiðini saman, so hetta ber avgjørt góð boð um framtíðina, sigur Pætur S. Clementsen, tekniskur stjóri við heimasíðuna hjá Fótbóltssambandi Føroya.

Næsti partur av Venjaraleiðini verður á skránni mánaðarskiftið apríl – mai.

Rebekka J. Olsen (t.h.) og Kristina D. Simonsen (t.v.) eru millum luttakararnar á Venjaraleiðini - Mynd: Bjarni Enghamar