KÍ skal tetta lekar

Ímóti EB/Streymi eiga klaksvíkingar møguleika at reisa seg eftir vónbrotið í Streymnesi í steypakappingini

Í Klaksvík hevur fótbóltslagið onkuntíð verið betri, enn tað er í hesum døgum. Fimm stig í seks dystum og sjeynda pláss er langt frá tí, sum tað undan kappingarbyrjan varð miðjað eftir. Íløgur eru gjørdar bæði í verjupartin og álopið, men stigatalvan sigur, at úrtøkan ikki er vunnin enn.

-Vit vóru óhepnir í Fuglafirði, tá ið vit vóru greitt omaná, men vit hava trupulleikar við at umseta møguleikar til mál. Lagið er framvegis gott undir venjing, og intensiteturin er stórur, tí vit ætla okkum allir pláss millum teir fyrstu ellivu. Vit dríva á, og vit vita, at evnini eru nóg góð til at tað skal síggjast aftur í úrslitunum og á støðutalvuni. Vit kenna EB/Streym, tí teir vunnu ímóti okkum í steypakappingini. Nú er setningurin hjá okkum at skora eitt ella tvey mál og at syrgja fyri, at mótstøðuliðið einki mál skorar, sigur KÍ liðformaðurin Jonas Flindt Rasmussen.

Allir KÍ spælararnir eru tøkir.

 

EB/Streymur tapti í sætta umfari 2-1 á heimavølli ímóti Víkingi. 6. apríl eydnaðist tað sundalagsmonnum at vinna 3-2 á heimavølli ímóti KÍ í fyrsta umfari í steypakappingini.

 

Merkisvert er tað, at tað á liðnum, sum er á veg til Klaksvíkar, eru tveir spælarar, ið eru uppvaksnir í KÍ, men sum ongantíð fingu møguleikan á besta liðnum í barndómsfelagnum, áðrenn teir fluttu til EB/Streym.

Niels Pauli Danielsen var 22 ára gamalur, tá ið hann á sumri í 2011 flutti úr KÍ, har hann bara í tveir minuttir ímóti Víkingi hevði verið á besta liðnum, og til EB/Streym. Har hevur Niels Pauli nú spælt 94 dystir og skorað tólv mál, og í ár er hann liðformaður og miðvallarálit.

Í vikuni verður Ragnar Danielsen 23 ár. Undan hesum kappingarárinum flutti hann úr KÍ og til EB/Streym, har hann tríggjar tær seinastu ferðirnar hevur verið millum teir fyrstu ellivu.

Rasmus Dan Sørensen og Jens Michael Jensen eru so mikið skaðadarvaðir, at teir eru ikki førir fyri at spæla.

KÍ-EB/Streymur: Kári J. á Høvdanum kl. 15.00.