Vil sleppa at venja í skúlatíð

- Eg havi ein dreym um at sleppa uttanlands at spæla fótbólt. Men ein treyt fyri at tað skal eydnast, er at eg skal venja nógv

Samuel Johansen Chukwudi er ein av spælarunum, ið byrjar á FSF Úrvalstilboðnum í Havn í komandi viku - Mynd: Hans Erik Danielsen

Samuel Johansen Chukwudi er ein av spælarunum, ið byrjar á FSF Úrvalstilboðnum í Havn í komandi viku - Mynd: Hans Erik Danielsen

Týsdagin varð skipað fyri kunningarfundum fyri spælarum og foreldrum um FSF Úrvalstilboðið, sum í komandi viku byrjar í Havn og í Norðragøtu. Ein av spælarunum er Samuel Johansen Chukwudi, ið sær nógvar møguleikar í hesum tilboði.

Dagliga spælir hann við HB, og hevur seinastu árini eisini verið partur av U15- og U17-landsliðunum. Men nú fólkaskúlin er nú liðugur, stendur eitt nýtt kapittul fyri framman hjá Samuel Johansen Chukwudi úr Havn: FSF Úrvalstilboðið.

- Fyrst og fremst vil eg mennast sum fótbóltsspælari. Tá eg gekk í 8. og 9. flokki gekk eg í “fótbóltsflokkinum”, so tá eg sá hetta tilboðið, meldaði eg til beinanvegin. Eg haldi tað er sera gott at sleppa at venja fótbólt bæði í skúlatíð og aftaná skúlatíð, sigur Samuel Johansen Chukwudi, ið er ein av spælarunum, sum byrja á FSF Úrvalstilboðnum í Havn.

Týsmorgunin í komandi viku byrjar eitt nýtt tilboð til fótbóltsspælarar, ið hava sína dagligu gongd á Glasi í Havn, á Miðnámi á Kambsdali, á Tekniska skúla í Klaksvík, ella hava annað starv. Talan er um “FSF Úrvalstilboðið”, ið hevur til endamál at bjóða spælarum eitt tilboð, har møguleiki er at samantvinna fótbólt og útbúgving ella arbeiði.

##med2## 

Ein av spælarunum er Samuel Johansen Chukwudi úr Havn. Spurdur, hvat hann væntar og vónar at fáa burtur úr hesum eyka venjingunum, sigur Samuel millum annað, at hann vónar sjálvandi at blíva ein betri fótbóltsspælari – kanska serliga á tekniska økinum.

- Men fyri at blíva ein betri fótbóltsspælari, er sera umráðandi at hava góðar venjarar, og tað eru tað nógvir av her, sigur Samuel Johansen Chukwudi, ið hevur ein dreym um at gerast yrkisleikari uttanlands. Men tað krevur nógv av einum sjálvum, og í hesum sambandi sær Samuel nógvar møguleikar í FSF Úrvalstilboðnum, sum kann hjálpa honum á vegnum til lívið sum yrkisleikari.

- Eg havi ein dreym um at sleppa uttanlands at spæla fótbólt. Men ein treyt fyri at tað skal eydnast, er at eg skal venja nógv, og hetta er ein sera góður møguleiki at fáa, tí nú sleppa eg eisini at venja í skúlatíð, sigur Samuel Johansen Chukwudi við heimasíðuna hjá FSF.

19 spælarar byrja á FSF Úrvalstilboðnum í Havn, og 23 byrja í Norðragøtu. Av teimum eru tríggir, ið ganga á Tekniska skúla í Klaksvík.

Samuel Johansen Chukwudi er ein av spælarunum, ið byrjar á FSF Úrvalstilboðnum í Havn í komandi viku - Mynd: Hans Erik Danielsen