Vilja ikki hava løn í Fuglafirði

ÍF spælararnir og venjararnir hava boðað felagnum frá, at teir ikki vilja hava løn fyri mars mánað

Um tað var soleiðis, sum tað upprunaliga varð ætlað, so hevði triðja umfar í landskappingini verið á skránni í morgin.

Týskvøldið 3. mars var stórsteypadysturin millum KÍ og HB, og so var ætlanin, at fyrsta umfar í Betri deildini skuldi vera sunnudagin 8. mars. Ætlanin var av ongum, og síðani hevur tað verið steindeytt í fótbóltinum.

Í feløgunum verður skipað fyri venjingum í smáum bólkum og spælararnir venja sjálvir.

At eingir dystir eru ber við sær, at inntøkugrundarlagið hjá feløgunum er nógv minni, enn tað annars hevði verið.

Í Fuglafirði hevur støðan við sær, at spælararnir og venjararnri nú hava gjørt av, at teir skulu ikki hava løn fyri mars mánað.

Liðformaðurin, Jan Ó. Ellingsgaard, skrivar soleiðis á facebookvanganum hjá ÍF fjepparunum:

Vit, í Betri-hópinum hjá monnum, hava arbeitt hart móti at gerast klárir til kappingarbyrjan, sum skuldi verða fyri tveimum vikum síðani. Vegna korona-farsóttina, er enn ógreitt nær hetta verður. Farsóttin ávirkar gerandisdagin hjá okkum øllum, og halda vit leikarar tí forminum við líka við sjálvvenjingum fyribils.

Vit eru sera góðir við okkara felag – ÍF. Tí hava vit leikarar og venjarar sjálvir tikið stig til, at frásiga okkum part av okkara lønum í mars. Hesum hava vit boða nevndini frá í dag. Somuleiðis skal tað sigast, at eg eri biðin um at skriva um hetta til tykkum fjepparar.

Tíbetur vísir tað seg, at vit standa sera væl saman í tíðum sum hesum. Vónandi gerst hetta ”korona-tíðarskeiðið” ikki ov langdrigið, so vit kunnu koma í okkara vanligu gerandisdagsrútmu aftur, og bólturin aftur kann fara á rull.