Føroyskur felagsskapur hevur sent 60.000 krónur til koronahjálp í Liberia

– Vit vita, at Afrika er sera sárbart, siga tey úr "Mirjam"

Felagskapurin "Mirjam" hevur sent 60.000 krónur til korona-hjálp í býnum Monrovia í Liberia.

Felagsskapurin hevur dagligt samband við fólk í Liberia, og føroysku umboðini hava keypt rís, spannir, sápu og klorin fyri at hjálpa fólki har.

– Nú korona herjar allan heimin, hoyra vit valla góð tíðindi. Um allan heimin sita menniskju og stúra, siga tey úr Mirjam.

– Vit vita, at Afrika er sera sárbart. Reinføri og matrot er ein avbjóðing. Hvør einstakur er í stórum vanda at fáa smittuna, sum ikki kann síggjast. 

– Men tað er ikki lætt at halda frástøðu, tá tey búgva so tætt. Vanligt er, at 10 fólk búgva í einum rúmi. Tá ber ikki til at vera í sóttarhaldi, um tú fært smittuna, sigur felagsskapurin, sum virkar fyri at hjálpa á hesum økinum.

##med2##

– Umráðandi er, at vit her heima ikki falla í fátt, men royna at gera tað, vit kunnu fyri at hjálpa teimum ikki at gevast á hendur! Við okkara hjálp, eru vit við til at bjarga lívi.

Og tí hevur felagsskapurin sent 60.000 krónur til hjálp í Monrovia, sum er høvuðsstaður í Liberia.

– Takk til tykkum øll sum áhaldandi stuðla arbeiðnum, siga tey úr Mirjam. 

Felagsskapurin Mirjam er ein sjálvsognarstovnur, ið byrjaði í smáum fyri 10 árum síðani. Í 2017 bleiv sjálvsognarstovnurin formliga settur á stovn við egnum viðtøkum, V-tali og skráseting hjá TAKS. Felagskapurin er ein diakonalur felaskapur, sum hevur bústað í Klaksvík og virkar við kvinnuíverksetan í Liberia og Kenya.

Persónarnir í felagsskapinum "Mirjam" eru Hilda Viderø, Johannes Johannessen úr Klaksvík og Anne Sophie Nordendal úr Bø.

Tey hava sent nakrar myndir, sum vit vísa her í greinini:

##med3##

##med4##

##med5##