Oslo bannar skeinking av alkoholi

Kommunan bannar nú barrum, matstovum og øðrum at servera alkohol.

Í kvøld kemur í gildi fullkomið bann fyri útskeinging av alkoholi í norska høvuðsstaðnum. Oslo hevur gjørt av at banna skeinking av alkoholi vegna koronasmittuvanda.

Býarstýrið í norska høvðsstaðnum hevur gjørt av, at søla av alkoholi á matstovum og barrum skal steðga frá í kvøld klokkan 20.30.

Bannið kemur, tí fleiri skeinkistøð ikki hava hildið reglarnar um at halda frástøðu frá hvørjum øðrum. Hendan reglan er sett í gildi fyri at avmarka koronasmittu.

– Vit eru í eini sera álvarsamari støðu, sigur vinnuborgarstjórin í Oslo, Victoria Marie Evensen, við sjónvarpsstøðina NRK.

– Vit mugu ansa eftir hvør øðrum og fáa tamarhald á smittustøðuni. Tíverri síggja vit, at tey, sum hava opið, ikki halda reglarnar. So tí eru vit noydd at seta onnur tiltøk í verk, sigur hon.

Tað verður enn loyvt at servera mat á matstovum í Oslo.

Bæði løgregla og aðrir myndugleikar hava seinastu dagarnar verið á umleið 650 eftirlitsvitjanum á skeinkistøðum í Oslo, sum enn hava opið, skrivar tíðindastovan NTB.

Hetta eftirlit heldur fram í kvøld.

/ritzau/