Tað var ein 18 ára gamal maður, sum seinnapartin í dag byrjaði at skjóta við skørpum í einum matvøruhandli í Buffalo.
Hendingin hevur higartil kostað 10 fólkum lívið, og fleiri eru særd. Buffalo liggur í deilstatinum, New York í USA.
Norska kringvarpið, sum endurgevur fleiri útlendskar miðlar, veit at siga, at maðurin var í skottryggum vesti, tá hann framdi álopið.
Maðurin er ikki eyðmerktur enn, men hann er handtikin og er í varðveitslu hjá løgregluni, sum metir, at hin 18 ára gamli var einsamallur um álopið.
Løgreglan hevur illgruna um, at talan var um haturskriminalitet, sum tey rópa tað - eina rasistiska atgerð.
Handtikni maðurin er hvítur, og hann hevði sambært løgregluni ferðast í fleiri tímar fyri at koma til matvøruhandilin, har hann framdi illgerðina.
Útlendskir miðlar vita at siga, at matvøruhandilin liggur í einum øki, har flestu íbúgvar eru littir.
- Vit kanna hendingina bæði sum haturskriminalitet og sum eina rasistiska atgerð, segði løgreglan á tíðindafundi í Buffalo eftir hendingina í dag.
