Fornminni
Avstralsku fornfrøðingarnir, sum hava kannað sporini, siga, at tey stava frá steinaldarfólki, sum hava gingið har fyri ímillum 19.000 og 23.000 árum síðani. Í hópinum hava verið bæði vaksin og børn og teirra millum ein maður, sum hevur verið umleið tveir metrar til hæddar. Tey hava gingið í leiri, og við tíðini eru fótasporini storknað og vorðin so hørð sum grót, siga fornfrøðingarnir við blaðið Sidney Morning Herald.
Fyri tveimum árum síðani frættu avstralsku fornfrøðingarnir, at ein kvinna hevði funnið eitt fótaspor einastaðni í statinum New South Wales. Nú er økið kannað, og tað vísir seg, at har eru ikki færri enn 457 fótaspor.
Sporini eru tey elstu, sum er funnin í Avstralia, og myndugleikarnir hava longu gjørt av, at tey skulu vera ferðamál hjá áhugaðum ferðafólki.
