Brian Falk ein av løgreglumonnunum, sum hevur fingið sær annað arbeiði. Í tíggju ár var hann løgreglumaður, men í dag arbeiðir hann sum trygdarmaður hjá einum flutningsfelagi í Kolding. Tað hevur havt stóra týdning. Hann fær umleið 50 prosent meiri í løn, enn hann fekk í løgregluni, og arbeiðstíðin er munandi betri, skrivar Ritzau.
Formaðurin í danska løgreglumannafelagnum, Peter Ibsen, sigur við danska útvarpið, at hann hevur fingið teldubræv frá umleið 2.000 løgreglumonnum, sum umhugsa at siga upp og at fáa sær annað arbeiði. Vansarnir eru vorðnir ov mangir og lønin ov lítil, sigur hann og vísir á, at byrjanarlønin hjá einum ungum løgreglumanni er 21.000 krónur um mánaðin, og tá arbeiðir hann partvíst um náttina og í vikuskiftunum.
Sambært Peter Ibsen hava løgreglumenn ikki torført við at fáa annað arbeiði, og tað eru serliga fyritøkur innan trygging og trygd, sum vilja hava løgreglumenn í arbeiði, sigur hann.
