Í fjør fingu 248 føroyingar staðfest krabbamein. Tað eru eitt vet fleiri enn í 2012, tá ið 234 føroyingar fingu staðfest krabbamein.
Tað er krabbameinsskráseting Føroya á Landssjúkrahúsinum, sum hevur gjørt uppgerðina.
Men Krabbameinfelagið vísir á, at talan er ikki um tey heilt endaligu úrslitini og tey skulu sostatt takast við ávísum fyrivarni.
Krabbameinsfelagið staðfestir, at hjá kvinnum er bróstkrabbi vanligasta slagi av krabbameini og í fjør fingu 25 kvinnur staðfest krabbamein.
Hetta slagið av krabbameini, tykist sostatt at liggja rættiliga støðugt, tí hesi seinastu sjey árini eru ímillum 20 og 25 tilburðir staðfestir um árið.
Les eisini: Føroyingar seta met í krabbameini í húðini Lungnakrabbi telist eisini ímillum tey vanligastu sløgini av krabbameini. Í fjør fingu 14 føroyingar lungnakrabba og tað er, sum tað plagar at vera, tí hesi seinastu árini hevur talið ligið ímillum 10 og 15 tilburðir av lungnakrabba um árið.
Annars hevur talið á føroyingum, sum hava fingið staðfest krabbamein um árið, verið hetta:
1995: 196 1996: 209 1997: 175 1998: 171 1999: 207 2000: 168 2001: 162 2002: 191 2003: 195 2004: 215 2005: 230 2006: 207 2007: 229 2008: 219 2009: 237 2010: 235 2011: 205 2012: 234 2013: 248
Í Krabbameinsfelagnum staðfestir Jancy Gaardlykke, at tað ber ikki til at taka nakrar ávísar niðurstøður um gongdina í Føroyum á krabbameinsøkinum.
- Føroyar eru eitt lítið land og tølini eru smá, og tískil kunnu nátúrligu sveiggini verða stór frá ári til ár, siga tey í Krabbameinsfelagnum.
Tí ber ikki til at siga hvønn veg rákið gongur, fyrrenn vit hava nógv ár at samanbera við.
Men hon leggur afturat, at partvís er fólkatalið hækkað og samstundis verða vit alsamt eldri, so tað er eisini væntandi, at talið á tilburðum við krabbameini fer at veksa, uttan at nakað ávíst skal leggjast í tað.
|
