Kanska hevur tað ikki stórt tíðindavirði í Føroyum, at ein trý ára gamal smádrongur nær Arendal í Noregi í kvøld doyði av løstum, hann fekk, tá hann endaði undir einum traktori.
Í øllum føri kann ein slíkur greinastubbi minna okkum á, at traktorur er ikki leikutoy hjá børnum, ei heldur hjá vaksnum saman við børnum.
- Barnið er dottið av traktorinum og er kroyst undir akfarinum, sigur átaksleiðarin, Frank Solås, við TV2.
Tá bjargingarfólk komu á staðið, hevði smádrongurin hjartasteðg, og lívbjargararnir góvu honum fyrstuhjálp.
- Tíverri vóru skaðarnir so mikið stórir, at drongurin ikki kundi bjargast. Royndin at bjarga smádreinginum varð steðgað, meðan familja hjá honum hjálparleys var hjástødd.
Tað skrivar Agderposten í kvøld.
Løgreglan váttar, at smádrongurin doyði um 19.15-tíðina í kvøld.
Vanlukkan verður kannað og soleiðis, sum Agderposten skilir, var tað ein í familjuni hjá tí trý ára gamla, sum koyrdi traktorin, tá vanlukkan hendi.
Myndin, sum er viðheft hesum greinastubba, hevur einki við hendingina í kvøld at gera.
