Higartil í ár hevur løgreglan í Suðurjútlandi handtikið tilsamans 54 fólk í samband við, at tey hava uppihildið sær ólógliga í havnini í Esbjerg, og seinasta samdøgnið eru níggju ungir menn handtiknir á havnalagnum.
Løgreglan sigur, at menninir vórðu handtiknir, tá funnið varð fram til, at teir høvdu krógvað seg í lastbilum við tí endamáli at koma sær ólógliga við DFDS-ferju til Onglands.
- Í hesum førinum var talan um yngri albanskar menn, sigur løgreglan í Suðurjútlandi í tíðindaskrivi.
Menninir høvdu sníkt seg inn á innhegnaða terminal-økið í havnini og høvdu krógvað seg í lastbilum. Teir eru nú skuldsettir og verða hildnir aftur við ætlan um útvísing og innferðarbann til Danmarkar.
Løgreglan hevur leingi hildið eyguni við støðuni í Esbjerg, og tey koyra javnan í økinum, eins og tey hava eitt gott samstarv við DFDS og Esbjerg Havn um støðuna.
