Í samfull 10 ár hevur Malena Arnholdsdóttir arbeitt við hesum nýggja brettspælinum.
Hon hevur m.a. verið forkvinna í Javna, men hevur samstundis givið sær stundir at fyrireika hetta spælið, sum uttan iva er størsta spurnarspælið sum nakrantíð er útkomið í Føroyum.
Hóast talan er um nógvar spurningar um Bíbliuna og úr Bíbliuni, so er spælið skipað soleiðis, at øll familjan kann spæla við.
Á spælibrettinum er ein gøta, sum gangast skal eftir. Her finnast bæði snávingarsteinar og gimsteinar - og spurningarnir sjálvandi.
Teir eru skipaðir í 12 bólkar við íalt 70 spurnarkortum í hvørjum. Teir eru síðani aftur skipaðir í trý torleikastig, soleiðis at bæði børn og vaksin kunnu spæla Manna samstundis.
Spurningarnir eru skipaðir soleiðis at teir standa á aðrari síðuni á kortinum, og svarini á hinari við tilvísing hvagani úr Bíbliuni svarið er tikið.
Manna-spælið kann verða brúkt bæði við og uttan spælibrettið, sum eitt vanligt borðspæl.
Tað er eisini vælegnað sum eitt spæl millum fleiri bólkar á størri samkomum ella fundum, og tað kann eisini væl nýtast sum undirvísingartilfar í sunnudagsskúlanum, ungdómsmøtum ella sum liðug í kristniundirvísingini í skúlunum.
