6.500 fleiri ferðafólk um flogvøllin í mai

Stóri vøksturin í ferðafólktalatalinum um Vága Floghavn heldur fram. Vøksturin í maimánaði var góð 25 prosent

– Vága Floghavn hevði afturgongd í ferðafólkatalinum í februar og mars, men seinastu tveir mánaðirnar hevur stórur vøkstur verið í ferðafólkatalinum. Vøksturin í apríl var 46 prosent, men minnast skal til páskirnar vóru í apríl. Í mai var vøksturin var heili 25,2 prosent. Hetta merkir, at 32.594 ferðafólk komu og fóru umvegis Vága Floghavn í mai. Tað eru umleið 6.500 ferðafólk fleiri enn í maj 2016.

Tað skrivar Vága Floghavn í tíðindaskrivi í dag.

Higartil í ár eru tilsamans 112.613 ferðafólk komin og farin umvegis flogvøllin. Hetta er ein samlaður vøkstur á 10,1 prosent ella gott 10.000 fleiri enn somu tíð í 2016. 

– Stóri vøksturin í ferðafólkatalinum kemst fyrst og fremst av, at fleiri útlendsk ferðafólk í ár hava ferðast til Føroyar. Føroyingar ferðast eisini meira, men størsti parturin av vøksturin er frá útlendskum ferðafólkum, sigur Jákup Sverri Kass, stjóri á Vága Floghavn, sum hevur góðar vónir um, at Vága Floghavn aftur fer at seta met við ferðafólkatalinum í 2017.

Her eru hagtølini yvir ferðafólk um Vága Floghavn árini 2013-2017: