Fleiri dystir hava í kvøld verið á skránni í undankappingini til Champions League. Millum annað spældu donsku meistararnir úr FC Midtjylland á útivølli á Kypros, meðan Ajax á heimavølli spældi móti Rapid Wien.
Og felags fyri bæði FC Midtjylland og Ajax er, at tey eru úti av Champions League kappingini. Hóast FC Midtjylland í kvøld vann 1-0 á útivølli móti Apoel Nicosia, so var talan tó um ov lítlan sigur, tí Apoel vann nevniliga 2-1 í fyrra dystinum, sum varð leiktur í Danmark fyri viku síðani.
Ajax spældi sín dyst á heimavølli móti Rapid Wien, eftir at liðini í fyrru uppgerðini høvdu spælt 2-2 javnleik í Eysturríki.
Og tað var útiliðið, Rapid Wien, sum í kvøld dró longra stráðið.
Rapid Wien vann dystin 3-2.
Úrslitini í kvøld hava við sær at Apoel Nicosia, Dinamo Zagreb, Rapid Wien og Monaco øll eru klár til seinasta undankappingarumfari av Champions League.
