Tað ríður um snarið hjá Áka Egilsnes, Allani Norðberg og Nicholas Satchwell og hinum í KA at vinna seg millum átta tey ovastu liðini í bestu íslendsku hondbóltsdeildini. Átta tey fremstu liðini vinna seg í endaspælið.
Júst nú er KA tvey stig røttumegin í stríðnum at enda millum átta tey ovastu liðini.
Áki Egilsnes skoraði fimm mál, og Nicholas Satchwell hevði sjey bjargingar, harímillum eitt bjargað brotskast tá KA á útivølli spældi javnleik 27-27 móti Afturelding. Í steðginum var Afturelding á odda 17-14. Sambært Morgunblaðnum høvdu bæði liðini stórar møguleikar, ið tey misnýttu móti dystarenda.
Sunnudagin tekur KA móti ÍBV á heimavølli á Akureyri. Sama dag spælir hitt føroyingaliðið, Fram á útivølli móti Selfoss. Liðið hjá Vilhelmi Poulsen og Rógva Dal-Christiansen er tvey stig frá plássinum sum gevur rætt til at kappast í endaspælinum.
Støðan:
Haukar 19 dystir 562:456 33 stig
FH 18 535:492 26
ÍBV 19 559:531 23
Valur 19 552:509 23
Selfoss 19 494:476 22
Stjarnan 19 545:524 21
Afturelding 19 504:514 20
KA 18 dystir 482:465 20 stig
-------------------------------------
Fram 19 dystir 500:493 18 stig
Grótta 19 486:515 12
Þór Ak. 19 425:528 8
ÍR 19 443:584 0