Ungverski málverjin Andras Gango er sera væl nøgdur við lutakastið til EM undankappingina.
Andras Gango hevði eitt brennandi ynski um at fáa Føroyar og heimlandið Ungarn í sama bólk.
Andras Gango kom til Føroyar í 2006, og følir seg veruliga sum ein føroying nú. Hann tosar flótandi føroyskt, og er eisini knýttur at føroyska fótbóltssambandinum.
Tað hevur hann gjørt síðani 2009, tá Andras Gango bleiv málmansvenjari á føroyska U-21 landsliðnum. Tí er lutakastið serligt fyri Gango.
Spurdur um hvussu Gango er nøgdur við lutakastið, svarar ungverski málverjin.
- Reint ítróttarliga er hetta tað besta lutakastið vit kundu ynskt okkum, bæði fyri Ungarn og Føroyar. Eg síggi stórar møguleikar fyri Føroyar at fáa góð úrslit í hesum bólkinum. Serliga á heimavølli dugi eg væl at ímynda mær, at Føroyar kann skapa eina sensatión í hesum bólkinum. Tað er serliga umráðandi fyri Føroyar at fáa eina góða byrjan í bólkinum, soleiðis at teir føroysku áskoðararnir veruliga fáa landsliðsfebur.
- Eg vóni at eg fái møguleikan at fara niður til Ungarn at hyggja, tá Føroyar skal spæla móti Ungarn. Fleiri vinmenn í Føroyum hava spurt gjøgnum nógv ár, nær vit skulu fara ein túr til Ungarn. Tí vóni eg at fleiri føroyskir áskoðarar koma við til Ungarn og sleppa at uppliva Budapest.
Tá Gango til seinast verður spurdur hvørjum landið hann fer at halda við, tá heimlandið Ungarn og Føroyar skulu spæla móti hvørjum øðrum, svarar Gango.
- Eg havi verið næstan 8 ár í Føroyum, og havi hjálpt til á U-21 landsliðnum í 5 ár. Tí krossi eg fingrar fyri Føroyum, og fari at halda við Føroyum.
Andras Gango hevur annars ein góðan vinmann, ið spælir fyri tað ungverska landsliðið. Áleyparin Tamás Priskin og Andras Gango eru uppvaksnir í sama umráðið og hava eisini deilt eina leiligheit saman, tá teir vóru yngri. Tí sigur Gango at tað hevði verið eyka stuttligt um hann slapp at heilsa uppá Tamás Priskin aftaná ein 1-0 sigur til Føroyar á Tórsvølli.
