Talan var um bert aðru FM-kappingina, eftir at Styrkifelag Føroya varð sett á stovn í 2020.
Aftur hesa ferð varð kappast í hølunum hjá Tvørmegi í Havn, og tað var hugaligt at síggja, hvussu stór framstigini eru hjá einstøku lyftarunum. Av tí sama varð talan eisini um met í mest sum øllum vektflokkum, tá luttakararnir royndu seg, og fyri fleiri var talan eisini um persónlig met.
Olympisk vektlyfting er skipað soleiðis, at kappast verður í tveimum greinum. Tær eru trekk, har vektin skal syftast upp um høvd í einum, og vend og stoyt, har vektstongin fyrst verður lyft upp á akslarnar, áðrenn seinasta takið upp um høvd verður tikið.
Luttakararnir hava trý lyft í part, og kappast verður tvørtur um kyn og vektflokkar á tann hátt, at vektin á steingini ongan tíð fer niður, men luttakararnir tørna til, so hvørt sum vektin er har, sum tey ætla at lyfta.
Anna Kristina og Niels Áki sterkast
10 luttakarar vóru til kappingina leygardagin. Av hesum vóru tríggjar kvinnur, og tvær teirra hava fyri tað nógva vant í Danmark.
Anna Kristina Norðberg Niclassen hevur vant lyfting í Danmark, áðrenn hon flutti til Føroya, og hon vísti seg sum sterkasta kvinnan. Hon lyfti 73 kg í trekk, meðan 94 kg fóru upp um høvd í ven dog stoyt. Henni á baki kom Maibritt Reynheim Petersen, meðan Erna Krett Hansen gjørdist nummar trý.
Hjá monnum varð roknað við, at kappingin fór at standa millum Niels Áka Mørk og Pól Hendrik Andreasen, men Pól Hendrikur hevði ein skaða í handliðnum, og tí lyfti hann bert tí einu ferðina í trekk, og var tað lyftið væl minni enn tað, sum hann vanliga lyftur.
Tað merkti tó ikki, at Niels Áki fekk frítt spæl. Serliga var tað Leif av Bøgarði, sum gav honum skarpan gang. Niels Áki lyfti 79 kg í trekk og 103 kg í ven dog stoyt. Leif lyfti ávíkavist 93 og 121 kg í somu greinum, men tá Niels Áki er væl lættari enn Leif, gav umrokningin til Sinclair-stigan honum oddasessin. Tað kann leggjast afturat, at verður hugt at úrslitunum til DM-kappingina í fjør, hevði avrikið hjá Niels Áka verið nóg mikið til at tryggjað honum gull.
Úrslit
Kvinnur
Navn vekt trekk vend&stoyt íalt Sinclair
Anna Kristina Norðberg Niclasen <71 73 94 167 214,637
Maibrit Reynheim Petersen <71 67 80 147 189,102
Erna Krett Hansen <76 48 60 108 130,857
Menn
Navn vekt trekk vend&stoyt íalt Sinclair
Niels Áki Mørk <61 79 103 182 263,298
Leif á Bøgarði <89 93 121 214 252,823
Rudi Persson <89 88 118 206 247,839
Sofus Bech <89 90 113 203 239,182
Mortan á Bøgarði <89 75 106 181 212,137
Pól Hendrikur Andreasen <73 45 113 158 205,431
Niels Juel Arge >109 81 115 196 205,347
Rói Hjaltalin <109 75 95 176 190,086
Sølvi Smith <89 60 75 135 159,753
