Tað verður eitt listaverk hjá Onnu Malan Jógvansdóttir, ið skal umboða Føroyar í arktisku listakappingini, sum kanadiska stjórnin skipar fyri í sambandi við Arktiska ráðharrafundin 24. apríl.
Í uppgávuorðingini til arktisku listakappingina varð lagt upp til, at ung millum 18 – 25 ár skuldu tulka evnið “Development for the People of the North”.
Dómsnevndin metti, at tekningin hjá Onnu Malan er visuelt í javnvág og virkar væl. Í sama viðfangi gevur hon eitt ítøkiligt boð upp á bundna evnið, og setir tað í ein føroyskan samanhang.
Havið og havsins tilfeingi eru í miðdeplinum, og við tilvísingum til frumsagnina um Havsins Móður flættar listafólkið smálutir - fisk, aldur, kulda og hav - saman í eina heild. Menniskjan og náttúran eru tengd at hvørjum øðrum, og rætturin til burðardygga nýtslu av náttúrutilfeinginum er í hásæti.
Í dómsnevndini vóru Inger Smærup Sørensen, umboðandi Norðurlandahúsið, Aase Bømler Olsen, umboðandi Listasavn Føroya og Margretha Nónklett, umboðandi Uttanríkistænastuna.
