Fyrrapartin hevur veðrið verið gott, og vánirnar fyri ólavsøkuveðrinum verða sagdar at vera góðar Klokkan 14 verður Ólavsøkan sett. Skrúðgonga fer úr kommunuskúlagarðinum, oman Niels Finsensgøtu og inn á Tinghúsvøllin, har Ansy Høghamar fer at seta Ólavsøkuna. Ansy, sum er ættað av Eiði og í nógv ár hevur búð í høvuðsstaðnum, hevur í mong ár verið ein av eldsálunum í Kyndli.
Sum altíð verður Havnar Hornorkestur við til at blása rætta ólavsøkuhýrin í.
Veðrið í høvuðsstaðnum hevur verið stilt og milt fyrrapartin. Onkur dropin er komin niður, men tað hevur ikki bilað.
Í Útvarpinum í morgun segði føroyski veðurmaðurin á DMI, Alex Rasmussen, seg rokna við góðum ólavsøkuveðri. Møguliga verður okkurt ælið seinnapartin, men tað er ikki víst. Fyrrapartin í morgin, tá ið skrúðgongan verður í og úr dómkirkjuni, og tá ið kórið fer at syngja undir Tinghúsinum og eisini á midnátt í annaðkvøld, tá ið felagssangurin verður, sigur veðurmaðurin seg rokna við fínasta veðri.
