Í gjár, hin 6. januar, varð nýggjur landsstýrismaður í fiskivinnumálum settur í starv. Maðurin er Árni Skaale, sum í dag hevði sín fyrsta arbeiðsdag í Fiskimálaráðnum.
- Í hesum sambandi varð skipað fyri samkomu, har starvsfólk í Fiskimálaráðnum nýttu høvi at ynskja nýggja landsstýrismanninum vælkomnum.
Tað vita tey í Fiskimálaráðnum at siga í dag.
Við løtuna í dag flutti aðalstjórin í Fiskimálaráðnum fram røðu og greiddi frá, at ein av uppgávunum hjá starvsfólkunum er at standa landsstýrismanninum í tænastu og at flyta hansara ætlanir út í lívið.
- Somuleiðis takkaði aðalstjórin vegna starvsfólkið Jacobi Vestergaard, fyrrverandi landsstýrismanni í fiskivinnumálum, fyri tíðina og gott samstarv.
Jacob Vestergaard segði eisini nøkur orð og takkaði fyri tíðina í Fiskimálaráðnum, eins og nýggi landsstýrismaðurin, Árni Skaale, bar fram heilsan við ynskjum um gott samstarv í tíðum sum koma.
##med2##
