Klokkan 18 fer Alex Troleis at bríksla fyrstu ferð á Tórsvølli, har B36 í hálvfinaluni í kappingini um løgmanssteypið fær vitjan av Víkingi. Talan er um seinnu hálvfinaluna. Víkingur vann fyrru hálvfinaluna 1-0, og tað stendur serliga nógv uppá spæl hjá B36, tí um tað ikki eydnast árstalsfelagnum at vinna seg í finaluna, so verður tað greitt, at B36 heldur ikki næsta summar fer at spæla í europeisku kappingini.
Tað eru trý ár síðani, at B36 seinast vann seg í finaluna, og finalan í 2018 fer altíð at standa í B36 søguni sum ein av mest dramatisku dystunum nakrantíð hjá flaggskipinum. Tá endaði tað 2-2 ímóti HB eftir longda leiktíð og brotssparkskapping. Tað heilt serliga var, at B36 megnaði í evstu løtu í vanligu leiktíðini at javna til 2-2, hóast tað tá vóru níggju úr B36 ímóti ellivu í HB, og at tað síðani eydnaðist at varðveita støðuna í longdu leiktíðini, áðrenn B36 vann brotssparkskappingina 5-4.
Fýra av teimum, sum nú fyrireika seg at spæla hálvfinalu ímóti Víkingi, vóru á liðnum minnisríka leygardagin 25. august í 2018. Teir eru Andrias H. Eriksen, Alex Mellemgaard, Bjarni Petersen og Benjamin Heinesen. Ragnar Samuelsen og Hannes Agnarsson vóru á beinkinum alla tíðina.
Síðani felagið varð stovnað í 2008, hevur Víkingur átt stóran lut í kappingini um løgmanssteypið. Víkingur vann steypafinalurnar í 2009, 2012, 2013, 2014 og 2015. Síðani hevur Víkingur verið í trimum steypafinalum, sum tað ikki er eydnast at vinna. Tvey tey seinastu árini hevur mótstøðuliðið verður HB, og í 2016 var tað KÍ, sum vann eftir longda leiktíð og brotssparkskapping.
Tríggir spælarar í Víkingi, sum vóru við at vinna steypafinaluna 3-0 ímóti NSÍ, eru framvegis á liðnum hjá Víkingi. Teir eru brøðurnir og landsliðsspælararnir Gunnar Vatnhamar og Sølvi Vatnhamar og so liðformaðurin Atli Gregersen.
Tíggju av teimum, sum vóru á vøllinum fyri einum ári síðani, tá ið Víkingur tapti steypafinaluna 2-0 ímóti HB, vera eisini við í kvøld, tá ið Víkingur fer at stríðast fyri at vinna seg í enn eina finalu um løgmanssteypið.
Seinna hálvfinala í kappingini um løgmanssteypið
B36 - Víkingur: Alex Troleis kl. 18.00
Víkingur vann fyrru hálvfinaluna 1-0
