Aftaná B36 hevði vunnið seg víðari í Europa Conference League undankappingini fyrr í dag við einum 2-0, og harvið samlaðum 2-0 sigri á Paide úr Estlandi høvdu tey flestu í B36 gjørt seg klár til, at B36 skuldi eina langa ferð til Norðurmakedonia í øðrum undanumfarinum.
Men nú vísir tað seg, at B36 skal eina heldur styttri ferð til Wales.
Shkendija úr Norðurmakedonia var stórur favorittur til at vinna á Haverfordwest í Wales í kvøld. Shkendija hevði eisini eina 1-0 leiðslu við sær til Wales frá fyrra dystinum. Men Haverfordwest megnaði at vinna dystin í kvøld 1-0, og so mátti longd leiktíð til. Tá stóð framvegis 1-0, og harvið samlað 1-1, og so mátti brotssparkskapping til.
Har hendi tað ótrúliga, at Haverfordwest brendi tvey brotsspørk, men lukkutíð fyri teir brendi Shkendija trý brotsspørk, og tí vann Haverfordwest brotssparkskappingina 3-2.
Tað verður tí Haverfordwest, ið kemur á vitjan í Gundadali á ólavsøku, hóskvøldið 27. juli.
Returdysturin í Wales verður leiktur hóskvøldið 3. august.
