Oddur Olsen er nýggjur ábyrgdarmaður á beinkinum, tá ið B68 seinnapartin fer stutta teinin inn á Mýrarnar at dystast við grannarnar. Dagsskráirnar eru heilt ymiskar. Hjá NSÍ snýr tað seg um at halda tørn um heiðursmerkjaplássið og vóna, at tað fer at styttast fram til toppin, meðan tað hjá B68 snýr seg um at vinna fyrsta sigurin í ár. Hjá B68 eru níggju av spælarunum, sum vóru við fyri summarsteðgin, ikki tøkir: Albert R. Johannesen, Evrard Blé, Otto R. Petersen, Leivur Højgaard og Jóhannus Hansen eru burturstaddir, Kristian Anton Andreassen og Esmar Clementsen eru skaddir, Hákun Edmundsson er fluttur til Danmarkar, og Carlos Quintana Herrero er givin í felagnum. Jóhan Dávur Højgaard er við aftur eftir leikbann, og Oddur Højgaard er komin aftur í barndómsfelagið eftir at hava verið burturstaddur. Nýggi álopsspælarin, Damir Ibric Yuksel, verður ikki við í dag, tí loyvini eru ikki komin upp á pláss. Hjá NSÍ er Johan Jacobsen farin av landinum. Tað kemur væl við, at Einar Tróndargjógv nú er tøkur aftur, og at Betuel Hansen og Tobias Olesen eru komnir at hjálpa til. Sambært NSÍ heimasíðuni var ætlanin hjá báðum feløgunum, at grannauppgerðin skuldi vera í gjár, eftir at stóra sølu- og mentanartiltakið var liðugt. FSF vildi ikki geva loyvi til flytingina frá sunnudegi til leygardag, tí hetta varð mett at geva NSÍ fyrimun sammett við AB, sum skal spæla í Gøtu í dag, og sum mikukvøldið eigur heimavøll ímóti NSÍ.