Tíggju ár eru liðin, síðan Biðimansfyritøkan Sólsetur sá dagsins ljós. Fyritøkan varð sett á stovn hin 16. januar í 2013.

Tað eru Lív og Hans Clementsen, sum eiga og reka fyritøkuna, ið hevur ment seg nógv hesi árini.

Fyritøkan er vaksin og hevur í dag um helvtina av søluni av líkkistum í Føroyum. Úrvalið er blivið breiðari, ymiskar støddir eru - heilt frá lítlum til eyka stórar líkkistur. 

Umframt hvítar eru tær eisini úr valnød og bambus á goymslu: Bambuskistan er kend fyri at vera ein av mest umhvørvisvinarligu, sum eru á marknaðinum.

Tað eru fleiri praktisk viðurskifti, sum skulu fáast upp á pláss, áðrenn ein jarðarferð kann fara fram.

Tað er her, at Sólsetur kann koma inn við sínum tænastum og vegleiðing til tey avvarðandi, soleiðis at tey kunna fáa hjálp við øllum teimum avgerðum, sum skula takast í samband við jarðarferðina. 

- Nú fyritøkan hevur tíggju ár á baki, er tað ein staðfesting, at tørvur er á okkum kring um í landinum og við teimum tænastum, vit bjóða fram. Ein av endamálsorðringunum í fyritøkuni er “virðiligur skilnaður er vakurt minni”, og hetta er altíð tað, ið vit hugsa um, tá vit eru til arbeiðis. 

- Fólk eru altíð vælkomin at spyrja um okkara tænastur og vegleiðing, og vit svara allar dagar í árinum. Tað var málið frá byrjan, at Sólsetur skuldi vera ein fyritøka, ið veitir tænastu til øll, sum hava brúk fyri okkum, siga Lív og Hans Clementsen frá Sólsetur.     

Les meira um tænasturnar á www.solsetur.fo