- Eg vónaði sjálvandi at vera tilnevnd til onkra virðisløn, men eri bilsin yvir tríggjar tilnevningar. Hetta er ein góð kensla, og eg bleiv ordiliga glað, tá eg fann út av tí. Tað er deiligt at vita, at fólk fáa nakað burturúr tí eg geri, og kunna brúka tað til okkurt.


Tað sigur songkvinnan Lea Kampmann, ið er tilnevnd til FMA-virðislønirnar Ársins songkvinna, Ársins útgáva og Ársins Bólkur/Einstaklingur.


Tilnevningarnar koma eftir, at Lea Kampmann gav út sína fyrstu útgávu við heitinum Common Blue. Ummælarar og lurtarar hava sum heild tikið væl móti útgávuni frá ungu songkvinnunim og tað fegnast hon um.


- Um so er, at fólk fáa nakað burturúr mínum tónleiki, so boðar tað frá góðum. Tað eri eg ordiliga glað fyri, tí tað er orsøkin til, eg fáist við tónleik. Um fólk ikki fáa nakað burturúr honum, gevur tað lítla meining at geva út, sigur Lea Kampmann.


Til ber at lesa eina longri samrøðu við Lea Kampmann í Vikuskiftis-Sosialinum, ið fæst til keyps í sølubúðum kring landið.