Sum sæst á yvirlitinum yvir tey kosnu, vóru tað meistaraliðini hjá kvinnum og monnum, ið fóru við flestu heiðrunum, og einki er at siga til tað, tí tað er ein mestsum náttúrlig avleiðing av avrikinum. Og tá vit tosa um tey allarbestu, ið vunnu heiðurin sum ársins spælari, blivu tað eisini tveir føroyameistarar: Birgit Guttesen úr Mjølni og Bárður Jacobsen úr ÍF.
– Sjálvt um tað er triðu ferð, at eg fái henda heiður, er tað líka stuttligt hvørja ferð. Eg haldi eisini, at tað var eitt sindur óvæntað hesa ferð, tí eg kappaðist við tvær á mínum liði, Sofíu Purkhús og Einu Stefaniu Kalsø, og tað kundi líka so væl verið onnur av teimum. Eg má bara staðfesta, at eg kann takka mínum góðu liðfeløgum fyri, at eg skuldi fáa henda heiður, tí tær eru allar góðar og gera meg til ein betri spælara, sigur 22 ára gamla Birgit Guttesen.
Næsta ár verður hon ikki partur av liðnum hjá Mjølni, tí hon fer til Danmarkar at spæla flogbólt. Enn vil hon einki siga um, hvørjum hon skal spæla við, men hon váttar, at hon nú bara bíðar eftir at fáa eitt sáttmálauppskot sendandi, sum hon so skal taka støðu til.
Heiður sum gávu
Diagonalspælarin hjá ÍF, Bárður Jacobsen, kundi í gjár halda sín 21 ára føðingardag, so hjá honum bleiv talan um nógv tillukku, hvørja ferð gestir komu á gátt, tí leygarkvøldið var hann kosin ársins spælari hjá monnum. Ein heiður, hann vann fyri fyrstu ferð, men sum hann er sera glaður fyri:
– Hetta er ótrúliga stuttligt. Eg veit ikki, um eg hevði væntað tað, men eg eri glaður fyri tað, sigur ungi norðagøtumaðurin, ið trúliga er farin til venjingar á Kambsdali í allan vetur, og sum við sera sannførandi spæli eisini var við til at vinna føroyameistaraheitið við ÍF.
– Tað hevur gingið hampuliga væl hjá mær í allan vetur, og eg havi so roynt at gjørt mítt besta. Flogbólturin hevur mín stóra áhuga, so tað er heilt fantastiskt at kunna enda kappingarári við at verða kosin ársins besti spælari.
