Minnast tit hesar jólamenninar?
Eftir at teir høvdu verið við til jólatræstendringina í Vága kommunu og høvdu givið børnunum pakkar, so sigldi Heimdal jólamenninar til Norðurpólin, har teir enn hava nógv at gera við at framleiða fleiri jólapakkar til jóla.
- Men jólamenninir gjørdu eina avtalu við Heimdal um at koma aftur eftir teimum, so teir kundu koma aftur at heilsa upp á børnini í Vága kommunu fyri jól og geva teimum ein pakka aftrat.
Á heimasíðuni hjá Vága kommunu verður upplýst, at borgarstjórin, Bjarni Prior, hevur snakkað við skiparan á Heimdal, og hann sigur, at teir væntandi koma inn á Sandavág nú sunnudagin umleið klokkan 16.45.
- Hóast borgarstjórin sigur seg ikki vera so jólaligan, so gleðir hann seg kortini sum ein lítil smádrongur til at síggja Heimdal jólaskrýddan og fullan av jólamonnum koma siglandi inn á vágna, so jólamenninir kunnu gleða børnini.
Heimdal fer at sigla inn á Sandavág og fram við sandinum har. Síðan fer hann víðari inn á Miðvág, har Heimdal leggur at í bátahylinum í Miðvági umleið klokkan 17.15.
- Síðan fer ein bilur hjá sløkkiliðinum at koyra jólamennirnar heim til fótbóltsvøllin, har børnini kunnu koma og heilsa upp á jólamenninar. Umframt at børnini fáa pakka, verður eisini ókeypis kaffi og kaka at drekka, sum MB stendur fyri.
Á heimasíðuni hjá Vága kommunu siga tey, at Tummars Heri & Co eisini fara at hugna um tiltakið við eitt sindur av jólatónleiki.
- Vit ynskja at halda tilmælini. Fótbóltsvøllurin er stórur, so tað ræður um ikki at samlast ov nógv saman og halda frástøðu, verður lagt aftrat.
