Bummgjaldið fyri at koyra ígjøgnum Vágatunnilin, eigur at halda fram. Men tað skal ikki brúkast til at gjalda Vágatunnilin, men til ein annan tunnil.
Tað heldur Dánjal Poulsen, stjóri í Faroe Travel.
Men hann heldur, at inntøkurnar av bummgjaldinum skulu framyvir ikki fara í Landskassan, men tær skulu heldur brúkast til at fíggja ein tunnili afturat í Vágum.
Og tað skal vera ein tunnil av Fútekletti í Vatnsoyrar.
Hann sigur, at ein tunnil av Fútakletti í Vatnsoyrar, hevði loyst fýra ferðsluvandar í Vágum.
1. Ferðslan í tætt bygdum øki í Miðvági.
2. Ferðslan við skúlaøkið á Giljanesi
3. Ferðslan í tætt bygdum øki í Sandavági.
4. Vandamikla og dýra farleiðin um Hálsin.
Hann vísir á, at nýggi tunnilin styttir farleiðina av flogvøllinum til Fútaklett einar sjey ella átta kilometrar, ella einar 12 -15 minuttir, umframt at trygdin verður munandi betri.
– Virðið í hesum sparingum er hundraðtals milliónir hesi næstu 50 árini væntar hann.
Og hann heldur, at hesin tunnilin kann fíggjast við verandi bummgjaldi í Vágatunlinum.
– Tíbetur varð Vágatunnilin ikki gjørdur til Sandavágs. Tað hevði verið skilaleyst, tí at tað bara hevði loyst ein av hesum fýra ferðsluvandunum, heldur hann
– Tá ið avgerðin at gera Vágatunnilin varð tikin, og at hann skuldi koma upp í Leynum, vóru fólk framskygd, so lat okkum eisini nú síggja frameftir -og upp um trætumálið um bummgjaldið, ljóðar áheitanin frá Dánjali Poulsen.
