Uni Rasmussen í Gøtu stillar upp til Fólkatingsvalið fyri Fólkaflokkin. Hesum boðar Fólkaflokkurin frá. Flokkurin skrivar, at brøðurnir Uni og Joen Magnus Rasmussen hava valt at býta uppstillingarnar sínamillum:
– Joen Magnus, sum situr á Løgtingi sum vara maður fyri Anniku Olsen, ætlar sær ikki á Fólkating, men vónar at verða valdur á Løgting í august.
– Uni hevur stóran áhuga í politikki, fyri donskum og føroyskum, og vil fegin tala søk føroyinga á Fólkatingi, um hann verður valdur, skrivar Fólkaflokkurin.
Á facebookvanga sínum skrivar Joen Magnus Rasmussen um beiggja sín:
»Hóast Uni gjørdist blindur, sum 21 ára gamal, í ferðsluvanlukku, hevur hann víst ein heilt serligan vilja til, at hetta ikki skal verða ein forðing í dagligdegnum. Hann kundi jú valt at sitið heima og tikið synd í sær sjálvum.
Ístaðin hevur hann gjørt slík megnaravrik, sum nærum einsamallur at klæða sær húsini í Gøtu, har meginparturin av arbeiðnum varð gjørt úr stiga.
Hann hevur verið uppi á takinum og gjørt viðlíkahaldsarbeiði.
Tá vit ein dag fletta 60 seyðir, so tummar hann allar 60.
Hann hevur runnið maraton.
Hann hevur súkklað úr Klaksvík til Paris við Rynkeby-liðnum.
Hetta eru bert nøkur dømi, um ein mann, sum avrikar nógv meir, enn væntast kann av honum.
Hann arbeiðir sum sjálvstøðugur vøddamýkjari, og er stjóri á Hotel Runavík.
Eisini er hann býráðslimur í Eysturkommunu.
Uni er róligur, siðiligur og passaliga tvørur.
Hesin viljin, ella hetta treiskni, eigur at koma væl við á Danatingi.
Eg ivist ikki, eg ætli at velja Una, og vóni at fleiri gera tað sama,« skrivar Joen Magnus Rasmussen um beiggja sín.
