Tað er nú greitt, at verkfallið hjá pedagogunum er av. Fyrr í kvøld varð eitt semingsuppskot lagt fyri partarnir, og tað hava báðir partar góðtikið, sigur Terje Sigurðsson, semingsmaður – og sostatt er verkfallið av.
Semingsmaðurin sendi boð eftir pørtunum klokkan 10 í morgun og síðani hava tey samráðst. Upprunaliga vóru ikki útlit fyri at fáa nakað semingsuppskot fyri partarnar í dag - men tað gekk betri enn væntað og partarnir fóru undir veruligar samráðingar. Fyrr í kvøld var tíðin so búgvin at leggja eitt semingsuppskot fyri partarnar og klokkan 23 í kvøld høvdu báðir partar góðtikið tað og nú er sáttmáli skrivaður undir.
Semingsmaðurin vil ikki siga, hvat stendur í semingsuppskotinum, tað letur hann upp í hendurnar á pørtunum at greiða frá.
(Mynd: Pedagogfelagið)