– Tá vit ikki skulu spæla móti Írlandi, var Norður-Írland tað besta, sum kundi henda.
Tað segði Brian Kerr við Sosialin, tá tað var greitt, at Føroyar vóru í sama undanbólki sum norðurírar.
Tí tað verður ein serstakur dystur fyri landsliðsvenjaran í annað kvøld.
Kerr hevur ógvuliga tøtt ættarbond til norðurírska grannalagið, og hann hevur gjørt greitt, at tað hevði verið serstakt fyri hann, um Føroyar fær stig.
Hevur vakt ans
Fjølmiðlarnir í Norður-írlandi varpa eisini ljós á føroyska landsliðsvenjaran undan dystinum.
At írski Brian Kerr hevur tilknýtið til Norður-Írland er ikki ein fyrimunur á Svangaskarði í morgin, tí hann kennir til bretskan fótbólt.
Hann hevur leingi verið partur av bretsku fótbóltsmentanini, og tí veit føroyski landsliðsvenjaran, hvussu hann skal seta kílar í álopsspælið hjá Norður-Írlandi í annað kvøld.
Stephen Craigan, verjuspælari, staðfestir, at Kerr fer at gera alt fyri at fáa stig.
– Føroyska liðið er væl fyrireikað. Hann veit helst meira um okkara lið og okkara spæliskipan, enn um sítt egna lið. Tað fer at hjálpa teimum. Hann vil vinna móti okkum. Hann vil smílast aftaná. Tað er Írland móti Norður-Írlandi, um tú vil rópa tað so, sigur Stephen Craigan, sum spælir við skotska Motherwell, við Press Associaion.
Verjuspælarin sigur, at Brian Kerr hevur tikið á seg eina stóra uppgávu við at stjórna føroyska landsliðnum.
– Hann er altíð ágrýtin. Tað prógvaði hann sum landsliðsvenjari hjá Írlandi. Kerr vil hava eitt gott úrslit, og vit skulu stríðast fyri at fáa fult, sigur hann.
Nøkur ivamál
Tað er framvegis ivasamt, um Símun Samuelsen og Jóhan Troest Davidsen verða í føroysku byrjunaruppstillini í morgin.
Hóast skaða, hava teir vant við í vikuskiftinum, men mánamorgunin var ikki endaliga greitt, at Samuelsen og Davidsen spæla við fullari megi í morgin.
Jann Ingi Petersen, sum var smáskaddur undan dystinum móti Slovenia fríggjakvøldið, tykist verður tøkur.
Tað eydnaðist ikki at fáa viðmerking frá Brian Kerr.
