Feløgini í Samtak heita á løgtingið um at taka um endan og broyta uppskotið um nýggja orkuískoytið, so tað kemur fleiri, sum veruliga eru hart rakt, til góðar.
– Løgtingið má taka um endan og broyta uppskotið um sonevnda orkuískoyti í lógini um familjuískoyti, sum kemur til viðgerðar í løgtinginum í dag, soleiðis at:
- upphæddirnar vera hægri
- tað kemur fleiri til góðar
- tað verður sett í gildi longu nú í desember
– Ætlanin er, at geva lægstu inntøkunum eitt orkuískoyti á 5000 krónur komandi ár, sum eitt slag av endurgjaldi fyri hækkandi avgjøld, sum landsstýrið setur í verk. Samstundis fer skipanin um hjálparískoyti á 12.000 kr um árið úr gildi, og skipanin við hækkaðum familjuískoyti á 750 kr um mánaðin fyri hvørt barnið fer eisini úr gildi, vísir Samtak á.
– Hesar lækkingar fara at taka grundarlagið undan summum av teimum mest fíggjarligu sperdu familjunum.
– Inntøkumørkini í orkuískoytinum eru alt ov avmarkandi. Tær lægru inntøkurnar, sum verða harðast rakt av avgjøldunum, fáa heldur ikki serligan lut í skattalættanum og ei heldur høga lønarvøkstrinum, tí inntøkurnar frammanundan eru so lágar.
Ein fyritíðarpensjónistur fær t.d. eitt sindur meir um árið í hækkandi veiting í 2024, sum háløntir lønarbólkar, sum landsstýrið hevur gjørt sáttmála við, fáa um mánaðin.
Feløgini í Samtak heita tí inniliga á løgtingið um at taka um endan og at broyta skipanina við orkuískoytinum soleiðis, at hon longu kemur í gildi í desember í ár – við kr. 5000 útgjaldi í einum, og at skipanin komandi árini verður 1000 kr um mánaðin í orkuískoyti ella 12.000 kr um árið.
– Eisini mæla vit til at hækka inntøkumørkini soleiðis, at er talan um stakan persón ella uppihaldara er inntøkumarkið fyri fullum orkuískoyti ein arbeiðaraløn. Er talan um tveir ella fleiri vaksnar persónar í húsarhaldinum eiga inntøkumørkini fyri at fáa fult orkuískoyti at vera tvær arbeiðaralønir, skrivar Samtak, sum eisini heldur, at orkuískoytið eigur eisini at lækka so líðandi heldur enn í einum, soleiðis at tað altíð loysir seg at forvinna nøkur oyru eyka. Mótrokningarmarkið kundi tískil verið 12% í orkuískoytinum fyri inntøkur, sum eru oman fyri áðurnevndu mørkini.
– Verður hetta gjørt fer hetta at vera ein bati, tí inntøkurnar sum eru um eina arbeiðaraløn og niðureftir hava ikki fingið serliga góðan lut í skattalætta, hesar inntøkur vera hart raktar av avgjøldum og hesar inntøkur eru frammanundan ótrúliga hart raktar av tí høga prísvøkstri, sum hevur verið seinastu árini.
– Afturat hesum má løgtinið antin sjálvt ella áleggja landsstýrinum at gera familjuískoyti til barnafamiljur rúmsáttari, so fleiri fáa lut í tí umframt at upphæddirnar ikki minka komandi ár, skrivar Samtak.
