Neyðugt er at seta seg í samband við IRF, áðrenn oljufýrsskipanin verður tikin niður.
Á løgtingsfíggjarlógini fyri 2023 eru settar 1,5 mió. kr. av til at stuðla niðurtøku og burturbeining av oljufýrdum hitaskipanum. Stuðulin er ætlaður privatum borgarum, sum eiga hús ella sethúsaeind, sum er hitað av egnari oljufýring. Stuðulsupphæddin er sett til 6000 kr. fyri burturbeining av oljfýri og ketli. Ein treyt fyri stuðli er, at oljufýrda skipanin verður skift út við góðkenda staðbundna elrikna hitapumpu, sum verður sett upp av góðkendum veitara, ella at lagt verður um til fjarhita.
Neyðugt við váttan frá IRF
Fyri at fáa hendan stuðulin er m.a. neyðugt við einari váttan frá IRF um burturbeiningina av oljufýri og ketli. Fyri at fáa hesa váttanina má borgarin vera á staðnum við prentaðum og útfyltum umsóknarblaði í hondini, tá ið IRF kemur eftir oljufýrinum og ketlinum. Síðani kvittar starvsfólkið hjá IRF fyri burturbeiningina. Tað ber ikki til at senda umsóknina eftirfylgjandi til IRF at undirskriva.
Tá ið umsóknin er útfylt, skal borgarin senda hana til Umhvørvisstovuna, ið varðar av stuðulsskipanini.
Bílegg burturbeining av oljufýrsskipan
Fyri at bíleggja burturbeining av oljufýri og ketli, kann borgarin ringja til IRF á tlf. 41 42 43 gerandisdagar frá kl. 8-15.
Til ber eisini hjá borgaranum sjálvur at koma til IRF við oljufýri og ketli, men avtala hesum viðvíkjandi skal gerast frammanundan við at ringja til IRF.
GG: IRF heintar bert oljufýrsskipanir í limakommunum felagsins. Er talan um eina oljufýrsskipan í Tórshavnar kommunu, má borgarin seta seg í samband við KB.
Les meira um stuðulsskipanina á umsóknarblaðnum her.
