B68 heintaði undan kappingarbyrjanini í ár tveir spanskar leikarar til felagið. Hesir báðir vóru sostatt fyrstu sponsku leikararnir, sum nakrantíð hava spælt í føroysku deildini. Men samstarvið við sponsku leikararnar hevur ikki eydnast eins væl og vónað á Toftum frammanundan. B68 er botnlið í Effo-deildini, og eigur enn sín fyrsta sigur til góðar í Effo-deildini higartil í ár. Hetta hevur eisini borið við sær, at felagið nú steðgar samstarvið við spanska áleyparan, Carlos Quintana Herrero, sum hevur skotið eitt mál fyri felagið í ár. Sambært keldum hjá Miðlahúsinum fer spanski áleyparin heim til Spania fyrsta dagin, og verður sostatt ikki partur av hópinum hjá B68 í seinnu hálvu. Ístaðin hevur felagið fingið sær ein bosniskan áleypara, sum helst skal skjóta neyðugu málini fyri toftamenn. Hann eitur Damir Ibric Yuksel.