Amerikanska tøknifyritøkan Microsoft hevur havt eitt avlop uppá 128,5 milliardir dollarar áðrenn skatt seinasta roknskaparárið, boðar felagið frá.
Tað vísir ársfrágreiðingin hjá Microsoft, sum fevnir um tíðarskeiðið frá 1. juli í fjør til 30. juni í ár.
Í fjórða ársfjórðingi av ársfrágreiðingini, sum fevnir um tíðarskeiðið frá apríl til juni í ár, hevði Microsoft ein umsetning upp á 76,4 milliardir dollarar.
Hetta er ein vøkstur á 18 prosent í mun til somu tíð í fjør.
Í fjórða ársfjórðingi hevði Microsoft eitt avlop uppá 34,3 milliardir dollarar áðrenn skatt, og tað er 23 prosent hægri enn í apríl-juni í fjør.
– Cloud og AI (vitlíki) eru ein drívmegi í virkisbroytingini í hvørjari vinnugrein og øki, sigur stjórin í Microsoft, Satya Nadella, í tíðindaskrivi.
/Ritzau/
