Nú øll starvsfólkini á dagstovninum Kura í Kollafirði í dag hava meldað seg sjúk, samstundis sum tey vísa á truplu støðuna á dagstovnaøkinum í løtuni, hevur In.fo vent sær til dagstovnaleiðaran í Kollafirði, Connie Lassen.
- Eg havi onga viðmerking til málið yvirhøvur, sigur leiðarin, sum heldur ikki vil svara spurninginum, um starvsfólkini fara til arbeiðis aftur fríggjadagin, tá gerandisdagur er aftur.
Tá vit fregnast eftir, hvønn vit so skulu spyrja, tá leiðarin sjálv einki vil siga um støðuna, vísir Connie Lassen á Jóan Petur Hentze, sum er trivnaðarstjóri hjá Tórshavnar kommunu.
Sambært álítandi keldum hjá In.fo, vísa starvsfólkini á dagstovninum Kura eisini á, at tey við tiltakinum í dag, har øll starvsfólkini hava meldað seg sjúk, eisini vilja vísa sín stuðul til Miðstovuna.
In.fo hevur roynt at fáa fatur í Jóan Peturi Hentze, trivnaðarstjóra í morgun, men tað hevur higartil ikki eydnast.
