Fýra dystir vóru um vikuskiftið í 1.deild hjá monnum. Í Leivík vann Víkingur greiðan sigur á teimum næstbestu hjá HB, sum tykjast hava tað trupult fyri tíðina, hóast teir eisini hava fingið fólk heim at spæla í summarferiuni.
Sum skilst úr Leirvík, so var sigurin fult uppiborin og kundi havt verið størri. Magnus Jarnskor legði teir næstbestu hjá Víkingi á odda miðskeiðis í fyrra hálvleiki. Tjúgu minuttir inn í seinna hálvleik økti Sverri Jacobsen til 2-0.
Hóast triðja málið er upplýst sum eitt brotssparksmál frá Svein Justinussen, so er talan, sum Sosialurin skilur tað, um sjálvmál.
Sostatt hevur HB tapt tveir dystir upp í slag. Seinast var skaðin ikki so álvarsamur, tí B68 megnaði ikki at vinna. Hesa ferð vóru havnamenninir ikki eins hepnir.
Fegnir toftamenn
B68 vann ein javnan og spennandi dyst í Gundadali móti B36. Einsamalla málið í dystinum skoraði Jónleif Højgaard stutt inn í seinna hálvleik. Sum skilst úr Gundadali, so var B36 væl við og kundu eins væl staðið eftir við bæði einum og øllum trimum stignum.
Sigurin merkir, at B68 nú er leyst frá Skála og FC Suðuroy, sum spældu javnleik 3-3 í Vági. Her javnaði FC Suðuroy í tíðini, sum dómarin hevði lagt afturat. Tað var Jón Krosslá Poulsen, sum umsetti brotsspark til mál.
Her var Skála annars á odda bæði 2-0 og 3-2. Ólavur Mikkelsen og Brian Jacobsen løgdu FC Suðuroy á odda í fyrra hálvleiki. Fyrst minkaði Búi Egilsson um munin og tjúgu minuttir fyri tíð javnaði Salmundur Bech. Tað gingu bara fýra minuttir, so var Skála á odda aftur. Aftur var tað Brian Jacobsen, sum skoraði.
Í yvirtíðini fekk so FC Suðuroy brotsspark, sum also Jón Krosslá Poulsen skoraði uppá.
Bæði Skála og FC hava 34 stig á ávíkavist triðja og fjórða plássi. Fýra stig aftanfyri B68.
EB/Streymur vendi hóttandi tapi
Teir næstbestu hjá EB/Streymi hava ongan áhuga í at flyta niður. Hóast teir hava rótað í botninum, sum tykjast teir hava fingið fótin fyri seg og klatra upp eftir stigatalvuni. Teir vóru aftanfyri 2-0 móti KÍ, men stóðu eftir um 5-3 vinnarar.
EB/Streymur fekk eisini tveir spælarar útvístar móti endanum,, men tá var støðan longu 5-2 til heimaliðið.
