Danska stjórnin fer komandi dagarnar at leggja fram ein grunn dubba donsku verjuna.
Tað segði Mette Frederiksen í kvøld eftir fund í París.
Fráboðanin kemur, eftir at DR fekk at vita, at grunnurin er verdur 50 milliardir krónur.
- Týdningarmesti boðskapurin í kvøld er tørvurin á vápnum. Vit skulu brynja okkum í Danmark, og vit skulu brynja okkum í Evropa, sigur Mette Frederiksen eftir fundin í París.
Her sigur hon, at stjórnin fer at kunngera grunnin "innan næstu dagarnar".
Peningurin í grunninum fer til eina skjóta endurvápning av donsku verjuni, veit DR frá fleiri sentralum keldum.
Sambært keldunum verður grunnurin innanhýsis nevndur nevndur "akseleratiónsgrunnurin".
Mette Frederiksen leggur eftir fundin í París dent á, at hóttanin úr Russlandi er verulig. Tí er sambært forsætisráðfrúnni eingin tíð at spilla við at royna at styrkja verjuna hjá Evropa.
- Vit skulu sleppa undan meira kríggi. Altso at Russland flytur kríggið úr Ukraina til onnur evropeisk lond, sigur Mette Frederiksen.
Í síðstu viku almannakunngjørdi fregnartænastan hjá verjuni (DEA) eina nýggja hóttanarmeting.
Her metti FE, at Russland hevur vápnað seg til møguliga at berjast ímóti einum ella fleiri NATO-londum komandi árini.
Ella fyri at kunna føra eitt veriligt stórkríggj í Evropa innan bert fimm ár.
Mette Frederiksen ávarar um, at ein ov "vánalig" vápnahvíld kann økja um vandan fyri einum nýggjum russiskum álopi.
- Ein vápnahvíld í Ukraina ljóðar kanska betri, enn hon í veruleikanum er. Tí vit risikera, at ein vápnahvíld ikki fer at geva frið, men í roynd og veru seta onnur evropeisk lond og Ukraina í eina enn hættisligari støðu.
- Tí Russland kann brúka eina vápnahvíld, um tað er á skeivum premissum, til at mobilisera og leypa á eitt nýtt land, sigur Mette Frederiksen.
Arbeiðið at stovna nýggja grunnin hevur verið í gongd leingi. Undir fyrireikingunum hevur danska stjórnin sambært upplýsingum frá DR umhugsað at seta upp til 100 milliardir krónur í grunnin.
Støddin á grunninum fer tó væntandi at enda á 50 milliardum krónum.
Hetta kemst sambært keldum hjá DR av eini meting um, at tað í løtuni ikki er nóg mikið av verjuútgerð í útbjóðing til at kunna keypa fyri eina størri upphædd.
Fyrstu 25 milliardirnar úr grunninum skulu eftir ætlan brúkast longu í ár, meðan restin av pengunum skal brúkast í 2026, siga keldurnar við DR.
Jyllands-Posten hevur eisini skrivað, at danska stjórnin ætlar at umganga vanligu mannagongdirnar fyri útbjóðingar.
Tann møguleikin liggur í lóggávuni, um neyðugt er at verja tjóðartrygdaráhugamál.
- Týdningarmesti boðskapurin frá mær í dag er, at Evropa skal brynja seg fyri at forða fyri, at kríggið breiðir seg til enn fleiri lond.
- Tað fer at vera øgiliga dýrt, og tað er synd, at vit eru sett í hesa støðuna. Men fortreytin fyri, at Ukraina kann samráðast um okkurt positivt og gott við Russland, er, at tey fokusera meira uppá vápn enn uppá vápnahvíld, sigur Mette Frederiksen.
/Ritzau/
