Meðan tey fótbóltsáhugaðu enn slikka sárini eftir órímilga brotssparkið í París í gjár, so er dómaraveldið longu í holt við fleiri reglugerðir. Ein teirra er, at útskeldaða VAR skal blanda seg enn meira upp í fótbóltin. Tað skriva altjóða miðlar.

International Football Association Board, stytt IFAB, er felagsskapurin, sum umsitur fótbóltsreglurnar. IFAB kemur javnan við nýggjum hugskotum til dómaralógina.

Sky Sports skrivar, at nýggjasta uppskotið er at VAR fær enn størri heimildir. Í løtuni kann VAR bara blanda seg upp í, tá talan er um ein greitt mistak í samband við rangstøðu, reytt kort, revsing til skeivan spælara og brotsspørk.

Í IFAB verður nú lagt upp til, at VAR eisini skal kunna blanda seg upp í, tá talan er um seinna gula kortið, hornaspørk og í ávísum støðum fríspørk. Sagt verður, at framtíðarbroytingar tó ikki mugu steðga spælinum.

Ætlanin er eisini at roynakoyra gul kort, sum geva tíggju minuttir útvísting. Eitt sindur sum tveir minuttir í hondbólti, men fyri útvald brot. Eitt nú fyri niðurgerandi atburður og málburður. Hartil verður leitað til rugby, har bara liðskiparin sleppur at tosa við dómaran í ávísum umstøðum. Eisini hetta verður væntandi royndarkoyrt í næstum.

Tað er ikki greitt hvar hetta verður royndarkoyrt, men tað er ikki óhugsandi at hesi uppskotini vinna fram í næstum.