Í dag byrjaði eitt rættarmál í Qaasuitsoq Kredsret, har ein maður er ákærdur fyri at hava dripið og sundurlimað ein mann í grønlendska býnum, Ilulissat.
Ákæruvaldið krevur, at hin ákærdi verður dømdur í trygdarvarðhald í óásetta tíð. Óhugnaliga hendingin fór fram í byrjanini av oktober fyri góðum ári síðan.
Maðurin, sum læt lív í Ilulissat, var 24 ára gamli, Maassannguaq Dalager.
- Eg vóni, at málið fer at ganga uttan trupulleikar. Nú hava vit reist ákæru, sum byggir á kanningararbeiðið hjá løgregluni í málinum.
Tað segði ákærin, Marutha Thayapharan, við Sermitsiaq, áðrenn rættarfundurin byrjaði.
Í byrjanini av oktober í fjør vórðu likamslutir av einum menniskja funnir á ruskplássinum í Ilulissat.
Trý fólk vórðu seinni handtikin í málinum, og ein maður og ein kvinna vórðu skuldsett umleið eina viku eftir, at likamslutirnir vórðu funnir.
Sermitsiaq veit at siga, at tað er bara maðurin, sum nú skal møta í rættinum í døgunum, 21. til og við 24. november.
Sambært ákæruritinum er maðurin ákærdur fyri dráp og fyri at hava viðfarið líkið av hinum 24 ára gamla á ósømiligan hátt.
Umframt, at ákæruvaldið vil hava hin ákærda dømdan í trygdarvarðhald, skal hann eftir ákæruritinum eisini rinda endurgjald til tey eftirsitandi.
Verjin hjá tí ákærda, Finn Meinel, vil sambært Sermitsiaq ikki gera viðmerkingar til málið, fyrr enn dómurin er sagdur.
