Tá lunnar vórðu lagdir undir stóra uppsjóvarvirkið hjá P/F Pelagos í Fuglafirði, setti Fuglafjarðar Arbeiðsmanna 700.000 krónur í verkætlanina.
Nú roynt verður at endurreisa Sandoy Seafood, sum fram til seinasta heyst hevði fiskaframleiðslu í Skopun, hava tey trý arbeiðarafeløgini í oynni rættiliga lagt rygg til at fáa virkið upp at koyra aftur.
Arbeiðarafeløgini í Sandoynni eru Sands Arbeiðarafelag og so bæði feløgini í Skopun, Skopunar Arbeiðsmannafelag og Arbeiðskvinnufelagið Vónin.
Tilsamans hava feløgini hjálpt til at útvega eina saltsproytu fyri umleið hálva aðru miljón, nú ætlanin er at arbeiða saltfisk á virkinum í Skopun, tá latið verður uppaftur.
Christian Johan Joensen, formaður í Sands Arbeiðarafelag, sigur, at tað verður soleiðis, at feløgini koma at eiga saltsproytuna, sum tey fara at leiga felagnum, ið fer at reka fiskavirkið.
- Leigan kemur ætlandi at svara til umleið avdáttirnar, sum vit skulu gjalda fyri saltsproytuna, sigur hann.
Á almennum eyka bygdarráðsfundi í Sands kommunu herfyri, segði stjórin í Marine Harvest Føroyar, Hans Jákup Mikkelsen, at ætlanin er at starta uppaftur í Skopun um nakrar vikur.
Teir, sum standa aftan fyri Delta Seafood og Marine Harvest Føroyar, hava seinastu mánaðirnar arbeitt saman við arbeiðarafeløgunum um eina loysn fyri fiskavirkið í Skopun.
- Vit hava nú skilt, at tað fer at draga nakað út aftrat, áðrenn saltsproytan kemur, og vit vænta tí ikki, at virksemi verður aftur á virkinum í Skopun fyrr enn í endanum av hesum árinum.
Christian Johan Joensen sigur seg vóna, at støðugt fiskaarbeiði fer at verða til eini 50 fólk, tá latið verður uppaftur í Skopun.
