Tey eru øgiliga trek at siga nakað, fólkini sum standa fyri samráðingum um nýtt landsstýri. Men sum vit hava skrivað fyrr í morgun, so er samgonguskjalið liðugt, á málsøkini eru býtt millum flokkarnar.
Beinir Johannesen vil einki siga annað enn tað, at tíðindafundur verður í morgin, helst klokkan 10, har samgonguskjalið verður undirskrivað.
Greitt er ikki enn, um tað verða seks ella sjey aðalráð, men okkurt bendir á, at tað verða sjey aðalráð, og at Fólkaflokkurin skal hava tvey landsstýrisfólk umframt løgmann, meðan Sambandsflokkurin og Javnaðarflokkurin fáa tvey landsstýrisfólk í part.
Bárður á Steig Nielsen verður annað av landsstýrisfólkunum hjá Sambandsflokkinum, hóast hann ikki vil svara greitt, tá vit spyrja hann, so váttar hann, at hann bjóðar seg fram og tekur av, um flokkurin vil hava seg til løgmann.
– Tað er tingmanningin hjá Sambandsflokkinum, sum tekur støðu til, hvør skal í landsstýrið fyri flokkin, sigur hann, og tí fær hann ikki staðfest, at hann sjálvur verður annað av landsstýrisfólkunum.
Men tað skal vera løgið, um flokkurin fer at nokta formanninum landsstýrissess, so tað mugu vit meta sum ein avgreiðsluspurning.
Spurningurin er so, hvør hitt landsstýrisfólkið hjá Sambandsflokkinum verður. Eitt boð kundi verið Eyðdis Hartmann Niclasen, sum fekk næstflestar atkvøður á valinum eftir formannin. So hevur flokkurin eisini javnstøðu.
Vit hava áður gitt, at Sambandsflokkurin eisini fær tingformannin. Tað vil Bárður á Steig Nielsen heldur einki siga um. Tað veldst sjálvandi um, hvussu málsøkini eru býtt millum flokkarnar, men í nógv ár hevur tað verið vanligt, at næststørsti flokkur – fær løgtingsformanssessin. Fellur tað Sambandsflokkinum í lut, so er Johan Dahl eitt upplagt boð til tað.
