Ein livandi mentanardepil

John av Reyni, formaður, Sosialistisk Ung
----
Mann kann ikki siga annað enn, at mangur barnaskógvur er slitin við Tórsgøtu, Trónd­ar­gøtu og Kongagøtu í Havn, har mong ættarlið hava lært sítt a-b-c og ikki minst hava barst við onkra tor­føra uppgávu av alskyns slagi. Tað sum fyrr var ein depil fyri læring, er í dag eitt skrímsl sum skríggjar út um sína neyð og elendigheit. Summi vilja vera við, at hetta eyð­kenda gula skapilsi skal varð­veitast, ímeðan onnur siga rív hatta niður og tað ongantíð ov skjótt; hetta er Kommunu­skúlin á mannatungu í dag!
Kommuskúlin hevur nógv at siga hjá mongum menn­iskjum og tí kann broyting vera eitt sindur torfør at hava við at gera. Tó er tað neyðugt við broytingum í samfelagnum fyri at kunna ganga framá og fyri at gera samfelagið betur.
Hugsa tær, at mann kundi miðsavnað okkara vitanar­depil og okkara evnaríku lista- og tónleikafólk á sama staði og givið teimum teir karmar sum vanta!
Hetta ber væl til, og er tann gamli guli skapningurin sum skaptur til hetta endamál við fleiri smærri hølum til eitt nú atelier, venjingarrúm, býarbókasavn og hobbyrúm. Afturat teimum smærru hølis­viðurskiftinum eru sjálv­sagt tey størru hølini, sum gamli salurin og tann stóri garðurin, ið kann rúma mongum leikum og kon­sert­um.
Kommunuskúlin kostar sjálvsagt at gera um, til ein sannan depil, sum vit kunnu vera stolt av, men vinningurin vil koma fleirfaldaður aftur. Vit kunnu bara hyggja eftir teimum størru lista- og songfuglum, sum hava spírað og hava tikið Føroyar runt allan knøttin.
Við at geva umstøður til okkara ríka tilfeingi, kann og vil hetta førka okkara list, tónleik og vitan frameftir og vil hetta sjálvsagt gera Føroyar enn ríkari og fjøl­broyttari, eitt stað har lív nørist og dreymar verða til veruleika!