Í morgun bórust tíðindini, at Eyðun á Lakjuni tekur yvir leiðsluna í Fuglafjarðar kommunu, meðan borgarstjórin, Dávur Juul, er í Danmark í sjúkraørindum.
- Tað ljóðaði so alvorligt í tíðindunum í morgun, men hetta er einki alvorligt - bara eitt slitið knæ, ið skal umvælast ella skiftast, skrivar Dávur Juul á sínum Facebook-vanga seinnapartin í dag.
Hann leggur aftrat, at vónandi verður hann skjótt á rókini aftur, sum hann tekur til.
Dávur Juul hevur í nógv ár siglt úti sum maskinmeistari, og ein fylgjari á tráðnum hjá honum viðmerkir, at tað ikki minst eru knøini, ið slíkt arbeiði ofta gongur útyvir.
