Dávur Winther
Hetta varð gjørt niðan fyri Klaksvíkar Sjúkrahús samstundis sum heilsurenningin og heilsukaféin fóru av bakkastokki.
Formaðurin í Heilsu- og Umhvørvisnevnd býráðsins, Auðunn Konráðsson, setti torraheilsurenningina í gongd og takkaði Treysti fyri ágrýtni teirra í eini ítrótt, sum øll kundu vera við. Og tað var eisini støðan henda dagin, heilt ung, ein hundur og heilt upp í 70-ára aldur vóru við. Hevur tú hampuligar skógvar og ert ílatin eftir veðrinum, so er bara at vera við.
Aftaná at rennarnir vóru farnir, var høvið at royna el-bilarnar hjá SEV. Fyrstur at royna hesar friðarligu bilar var Auðunn Konráðsson, formaður í Heilsu- og Umhvørvisnevndini. Tað vóru ymisk viðurskifti at seta seg inn í men ógvuliga ljóðleyst fór bilurin strúkandi avstað.
Onkur tók til, at tað var sum at koyra truck - eitt sindur av suði - og serliga tá ið bilurin hekk í gearinum, hoyrdist ljóð. Tá løddi hann uppí battaríini.
Enn eru bilarnir nakað dýrir at keypa og eitt av málunum eru, um til ber at gera battaríini so lítil, at til ber at skifta tey, sum við eini el-borimaskinu, heldur enn at standa leingi og løða á einum staði. Hesir bilarnir eru tó eitt áhugavert alternativ til bensinbilarnar, sum kunnu roknast við at gerast dýrari í brúki, sum frá líður - og dálkandi eru teir eisini.
El-kostnaðurin liggur um kr. 25,- frá Tórshavn til Klaksvíkar.
Eftir at hava roynt bilarnar, varð farið niðan á Klaksvíkar Sjúkrahús at máta blóðtrýstið og annars at fáa heilsugóðan mat og drekka. Í durunum stóð Aksel V. Johannesen, landsstýrismaður í heilsumálum og tók í móti og prátið gekk lystiliga.
