Svenska Aftonbladet veit í kvøld at siga, at eldur er í fleiri bátum við eina smábátahavn í Limhamn í Malmø í kvøld.
Sagt verður, at fleiri spreingingar eisini hava verið.
Sambært blaðnum eru hetta bátar, sum standa uppi á landi. Fyribils er einki frætt um, at fólk hava fingið skaða.
Neyðsynjarakfør eru á staðnum, og bjargingararbeiðið er í gongd.
Hildið verður, at spreingingarnar stava frá gassfløskum, sum vóru umborð á bátunum, sigur Annelie Silveira hjá SOS Alarm.
Aftonbladet veit eisini at siga, at nógvur roykur er í økinum við bátahylin, har eldurin herjar umborð í fleiri bátum.
