Málið er fyrsta mál á dagsskránni hjá Løgtinginum í dag og er til triðju viðgerð.
Uppskotið hjá Bárði á Steig Nielsen, landsstýrismanni í fiskivinnumálum, gevur bátunum í bólki 5 B 750 felags fiskidagar afturat. Fiskidagarnir hjá bólkinum vóru uppi fyrst í august, og bátarnir noyddust tí at gevast við fiskiskapinum.
Løgtingið samtykti uppskotið við aðru viðgerð mikudagin. Tá atkvøddu 22 tingfólk fyri og sjey ímóti.
Fólkaflokkurin, Javnaðarflokkurin, Sambandsflokkurin, Sjálvstýri og Steffan Klein Poulsen úr Miðflokkinum atkvøddu fyri. Tjóðveldi og Framsókn atkvøddu ímóti.
Undan atkvøðugreiðsluni varð skotið upp at beina málið aftur í Vinnunevndina, men tað uppskotið fall við sjey atkvøðum fyri og 22 ímóti.
Næstan øll hoyringarsvar mæltu frá
Uppskotið hevur elvt til nógv kjak, tí flestu hoyringarpartarnir mæltu frá at lata eyka fiskidagarnar.
Millum teirra, sum hava mælt frá, eru Føroya Reiðarafelag, Føroya Fiskimannafelag, Føroya Skipara- og Navigatørfelag, Meginfelag Útróðrarmanna, Føroya Ráfiskakeyparafelag, Føroya Ráfiskaseljarafelag og Havstovan.
Víst hevur millum annað verið á, at uppskotið víkir frá galdandi umsitingarætlan og veiðireglu, kann økja veiðitrýstið á botnfiskastovnarnar og møguliga fáa avleiðingar fyri MSC-góðkenningarnar.
Bert Suðurstreymoyar Útróðrarfelag tók greitt undir við uppskotinum í hoyringini.
Landsstýrismaðurin hevur tó hildið fast við, at talan er um eina serliga og tíðaravmarkaða loysn fyri fiskiárið 2026.
Stórur meiriluti í Vinnunevndini
Seks av sjey limum í Vinnunevndini mæltu Løgtinginum til at samtykkja uppskotið.
Meirilutin vísti á, at miðalavreiðingin hjá bólki 5 B higartil í ár hevur verið umleið 440 kilo fyri hvønn fiskidag. Verða 750 dagar lagdir afturat, svarar tað til eina væntaða veiðu á umleið 330 tons.
Eirikur í Jákupsstovu úr Tjóðveldi var einsamallur minniluti í nevndini. Hann mælti frá at samtykkja uppskotið og ávaraði um, at avgerðin kann seta størri virðir í vanda.
Verður uppskotið samtykt við triðju viðgerð í dag, fáa ikki fullriknu útróðrarbátarnir í bólki 5 B endaliga heimild til at brúka teir 750 eyka fiskidagarnar í ár.
