Erla er framvegis ein perla

Seinastu árini hevur Erla Kongsdóttir úr Fuglafirði verið suveren í kappingini millum 5-mannafør við kvinnum. Soleiðis vísti tað seg eisini at vera í dag. Tá ið bátarnir fóru um málið, var Erla Kongsdóttir meiri enn eina bátslongd undan Firvaldi av Tvøroyri.

Firvaldur hevur seinnu árini ofta staðið seg væl í kappingini millum 5-mannafør við gentumanning. Nú bjóðar Firvaldur av í kappingini millum kvinnurnar, og í startinum var Firvaldur heilt væl við. Tað var Blikur av Argjum eisini, men skjótt vóru tað Erla Kongsdóttir og Firvaldur, sum løgdu seg framum hinar bátarnar.

Í fyrsta FM róðrinum er røðin tilvildarlig skilt á tann hátt, at tað er við lutakasti, at bátarnir verða plaseraðir. Í dag var heilt langt millum Firvald, sum var úti á fjørðinum, og Erlu Kongsdóttir, sum róði undir Skálalandinum.

Á málinum vóru tað tvær bátslongdir frá Erlu Kongsdóttir og aftur til Firvald. Blikur vann bronsukappingina. Kvinnurnar av Argjum vóru meiri enn tvær bátslongdir aftanfyri Firvald. Tekla úr Klaksvík vann kappingina um fjórða plássið við Tjaldrið. Tað var um reppið, at Tekla misti fjórða plássið, tí tær úr Klaskvík løgdu inn, áðrenn tær komu á mál, men so spentu tær í aftur.

5 MANNAFAR KVINNUR