Tað er ymiskt, hvat verður kravt, um tey nomineraðu ikki taka við avbjóðingini, men í allar flestu førum er tað tó ein biograf-túrur, sum stendur upp á spæl.
Tá Kringvarpið leygardagin tosaði við Johnny Olsen, sum rekur Atlantis í Klaksvík, helt hann fyri, at tey høvdu merkt ein vaksandi áhuga.
- Eg haldi at fólk hava gingið meira í biograf seinastu dagarnar. Og í fleiri førum er talan um fólk, sum hava lopið, men sum so kortini eisini taka bio-túrin, so hetta hevur heilt víst ávirkað okkum positivt, segði Johhny Olsen við Kringvarpið.
Stjórin í Havnar Bio, Jákup Eli Jacobsen, er ikki eins avgjørdur, tá vit settu honum sama spurning.
- Tað hava gingið nógv fólk í biografinum seinastu tíðina, men eg haldi nú hetta kemst mest av, at vit hava nakrar góðar sýningar á løriftinum. Tó havi eg lagt til merkis, at tað eru nógv fleiri gávukort seld seinastu vikuna, enn tað vanliga er talan um, so har hevur tað helst ávirkað nakað, sigur Jákup Eli.
